Umudu yox etsən
 talasan məni,
 Sevən ürəyimə
 Çəkdirsən qəmi,  
 Sən məni ağladıb dərd-qəmə salsan,    
 İzləyib kölgətək hər gecə səni,    
 Xəyaltək gözünə görünəcəyəm,    
 Səni röyalara gətirəcəyəm.    

 Laylanı çalacaq,
 Eşqim, harayım.    
 Sinəmə çəkdiyin dağları bir-bir,    
 Yazdım, sanadım.

Ağladım min dəfə, öldüm min dəfə,  
 Öldürsən də məni
 Halaldı qanım.
 Nə etsən, qəlbimə döz deyəcəyəm.    
 Səni röyalara gətirəcəyəm.    

 Sevgimi kağızlar, qələmlər anlar,
 Ağıl çox acizdir,  
 Ürəklər duyar.    
 Gündüz bu dünyamı, ömrümü bəzə,  
 Gecə röyaları, sevdamı bəzə.    
 Gəlməsən yuxu da görməyəcəyəm,  
 Səni röyalara gətirəcəyəm.    

 Sənə ürək verdim,  
 Ürək ummadım.  
 Duyğular dənizdir,  
 Körpü qurmadım.
 Qərq oldum dəlisov dalğalarında,  
 Ömrümün bu gənclik, cavan çağında.    
 Ay nədir, il nədir bilməyəcəyəm,
 Səni röyalara gətirəcəyəm…