Mən elə bilirdim mən yaz olanda,  
 Sən çiçək ömrünü bəxş edəcəksən.  
 Mən elə bilirdim mən saz olanda,  
 Mizrabtək simlərdə izləyəcəksən.    

 Mən elə bilirdim yaxınsan, yaxın,  
 Yaxıntək uzaqsan, uzaqlardasan.  
 Mən elə bilirdim vəfa ocağı,    
 Sədaqət çırağı yandıracaqsan.  

 Mən elə bilirdim ayrılıq yalan,    
 Sən isə gördüyüm yuxu deyilsən.    
 Mənimçün hər kəsdən lap yaxın olan,    
 İndi niyə mənə yaxın deyilsən?

 Mən elə biirdim mən qəm olanda,    
 Ağlayan notlara bəm olacaqsan.
 Mən elə bilirdim mən ağlayanda,    
 Gözlərimi silən sən olacaqsan.    

 Mən elə bilirdim isti əllərin,
 Soyuq əllərimi tutacaq hər an.    
 Mən elə bilirdim qəmli gözlərim,
 Qara gözlərinə baxacaq hər an.    

 Mən elə bilirdim ürəkdə sənsən.    
 De, hansı sinədə döyünəcəksən?  
 Söylə, ay ürəyim, ürəyin varmı?      
 Məni hansı qəlbdə dəfn edəcəksən?